ភ្នំពេញ៖ ក្រសួងធនធានទឹក និងឧតុនិយម បានប្រាប់ឱ្យដឹងថា អាកាសធាតុនៅកម្ពុជាសប្តាហ៍ក្រោយនឹងបន្តធ្លាក់ភ្លៀងលាយឡំនឹងផ្គរ រន្ទះ និងខ្យល់កន្រ្តាក់ ប៉ុន្តែអាកាសធាតុនឹងឡើងដល់ជិត ៤០អង្សា។
បាតុភូតទាំងនេះ គឺកើតឡើងដោយសារកម្ពុជាបន្តទទួលឥទ្ធិពលពីជ្រលងសម្ពាធទាបក្នុងកម្រិតពីខ្សោយទៅមធ្យម គួបផ្សំ និងខ្យល់ប្រែប្រួល។
នៅតំបន់ទំនាបកណ្តាល នឹងមានសីតុណ្ហភាពអប្បបរមា មានពី ២៥-២៧អង្សា និងសីតុណ្ហភាពអតិបរមា មានពី ៣៧-៣៩អង្សា អាចមានភ្លៀងក្នុងកម្រិតពីខ្សោយទៅតិចតួច លាយឡំទៅដោយផ្គរ រន្ទះ និងខ្យល់កន្ត្រាក់។
នៅតំបន់ខ្ពង់រាប សីតុណ្ហភាពអប្បបរមា មានពី២៥-២៧អង្សា សីតុណ្ហភាពអតិបរមា មានពី ៣៦- ៣៨អង្សា ហើយអាចមានភ្លៀងក្នុងកម្រិតពីខ្សោយទៅតិចតួច លាយឡំទៅដោយផ្គរ រន្ទះ និងខ្យល់កន្ត្រាក់។ ចំណែកនៅតំបន់មាត់សមុទ្រ សីតុណ្ហភាពអប្បបរមា មានពី ២៤-២៧អង្សា និងសីតុណ្ហភាពអតិបរមា មានពី ៣៣-៣៥អង្សា ហើយអាចមានភ្លៀងក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់។
ក្រសួងធនធានទឹកអំពាវនាវពលរដ្ឋ បង្កើនការប្រុងប្រយ័ត្ន ចំពោះបាតុភូតធម្មជាតិដែលអាចកើតមានឡើងជាយថាហេតុ៕
